شوية عربى بأه .......امبارح كنت عاملة ماسك الكركم بزيت الزيتون , والكركم اجاركم الله , ما بييجى على شى الا وقام بالواجب وزيادة , المهم اللى حصل انى وانا بحطه على وشى نقطة منه وقعت على البلوزة بتاعه بيجامتى الجديدة , انا كان هيجرالى حاجة بجد لانى بحب البيجامة دى جدااااا , بس قلت دعاء المصيبة اللى هو "الحمد لله ,اللهم اجرنى فى مصيبتى هذه واخلفنى خيرا منها " وقلت هاغسلها حالا عشان البقعة تروح . المهم جربت معاها احسن ( واردأ) مساحيق الغسيل ...انها تروح ولا تتعتع من مكانها ! ابداااا . كنت هاعيط بجد عملت معاها كل حاجة ودى ثابتة على موقفها , قلت امرى لله باه ونشرتها زى ما هى وخلاص وبعدين بعد ما نشفت وانا بشيلها من على الحبل
guess what !
البقعة اختفت !!! فعلا مالهاش ولا اثر مع انى لما جيت نشرتها كانت موجودة زى ماهى , ودى يأكدلنا قول الاخ الفاضل اللى قال "مع
تايد للغسيل مفيش مستحيييييييييييل " ترررم
نتعلم ايه باه من كلام ستات البيوت الحامض ده ,هى حاجة جت فى دماغى اول لما شفت الحكاية دى , انه انا المفروض اعمل كل اللى عليا فى اى حاجة نويت اعملها بغض النظر عن النتايج . يعنى لو قررت امشى فى طريق ونويت عليه , ابدا اعمل كل اللى عليا فى حدود اللى اعرفه والنتيجة بعد كده تبقى بتاعة ربنا , ربنا هيحاسبنى على اللى فى ايدى وبس , ده غير انى هاكون مستريحة لان شعور ان الواحد عمل اللى عليه وبذل اقصى مجهوده لا يقدر بثمن
انا عارفه ان الموقف مش مستاهل كللل الكلام الكبير ده , بس دى كانت وجهة نظرى لما حصل
No comments:
Post a Comment